ಧೋನಿ ನಾಯಕತ್ವದಲ್ಲಿರುವ ವಿಶೇಷ ಗುಣವನ್ನು ಬಹಿರಂಗಪಡಿಸಿದ ಚಹರ್‌!

0
6
ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್‌ನ ಸಾರ್ವಕಾಲಿಕ ಶ್ರೇಷ್ಠ ನಾಯಕರಲ್ಲಿ ಮಹೇಂದ್ರ ಸಿಂಗ್‌ ಧೋನಿ ಕೂಡ ಒಬ್ಬರು. 2007ರ ಟಿ20 ವಿಶ್ವಕಪ್‌, 2011ರ ಏಕದಿನ ವಿಶ್ವಕಪ್‌ ಹಾಗೂ 2013 ಚಾಂಪಿಯನ್ಸ್ ಟ್ರೋಫಿ ಸೇರಿದಂತೆ ಮೂರು ಐಸಿಸಿ ಟ್ರೋಫಿಗಳನ್ನು ಗೆದ್ದಿರುವ ಏಕೈಕ ಭಾರತೀಯ ನಾಯಕ ಎಂಎಸ್‌ ಧೋನಿ. ಭಾರತವಲ್ಲದೇ ವಿಶ್ವ ಕ್ರಿಕೆಟ್‌ನಲ್ಲಿಯೂ ಎಂಎಸ್‌ ಧೋನಿ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ.

ನಾಯಕತ್ವದ ತಮ್ಮ ಅನುಭವದಿಂದ ಎಂಎಸ್‌ ಧೋನಿ ಹಲವಾರು ಯುವ ಆಟಗಾರರಿಗೆ ಅದ್ಭುತವಾದ ಮಾರ್ಗದರ್ಶನವನ್ನು ನೀಡಿದ್ದಾರೆ ಹಾಗೂ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿಯೂ ಇದನ್ನು ಮುಂದುವರಿಸಿದ್ದಾರೆ. ಧೋನಿಯಿಂದ ಮಾರ್ಗದರ್ಶನ ಪಡೆದ ಹಲವು ಪ್ರತಿಭೆಗಳಲ್ಲಿ ದೀಪಕ್ ಚಹರ್‌ ಕೂಡ ಒಬ್ಬರು.

ಹಾಗೂ ಯುವ ವೇಗಿ ಅವರು, ಎಂಎಸ್‌ ಧೋನಿಯಲ್ಲಿರುವ ಅತ್ಯುತ್ತಮ ಗುಣಮಟ್ಟದ ಅಂಶವೊಂದನ್ನು ಬಹಿರಂಗಪಡಿಸಿದ್ದು, ಸಿಎಸ್‌ಕೆ ನಾಯಕ ಸನ್ನಿವೇಶಕ್ಕೆ ತಕ್ಕಂತೆ ಆಟಗಾರರನ್ನು ಸದುಪಯೋಗಪಡಿಸಿಕೊಳ್ಳುತ್ತಾರೆ ಎಂದು ಹೇಳಿದ್ದಾರೆ.

ಎಂಎಸ್‌ ಧೋನಿ ಅಡಿಯಲ್ಲಿ ರೈಸಿಂಗ್‌ ಪುಣೆ ಸೂಪರ್‌ ಗೈಂಟ್ಸ್‌ ಹಾಗೂ ಚೆನ್ನೈ ಸೂಪರ್‌ ಕಿಂಗ್ಸ್ ತಂಡಗಳಲ್ಲಿ ದೀಪಕ್‌ ಚಹರ್‌ ಆಡಿದ್ದಾರೆ. ಧೋನಿ ಚೆನ್ನೈ ಫ್ರಾಂಚೈಸಿಯಲ್ಲಿ ಸ್ಟ್ರೈಕ್‌ ಬೌಲರ್‌ ಆಗಿ ನನ್ನ ಮೇಲೆ ಅಪಾರವಾದ ನಂಬಿಕೆ ಇಟ್ಟಿದ್ದಾರೆಂದು ಅವರು ತಿಳಿಸಿದ್ದಾರೆ.

ಚೆನ್ನೈ ಸೂಪರ್‌ ಕಿಂಗ್ಸ್ ಪರ ನಾನು ಇದೀಗ ನಾಲ್ಕನೇ ಬಾರಿ ಆಡುತ್ತಿದ್ದೇನೆ ಹಾಗೂ ಸ್ಟ್ರೈಕ್‌ ಬೌಲರ್‌ ಆಗಿ ಧೋನಿ ಭಾಯ್‌ ನನ್ನ ಮೇಲೆ ಅಪಾರವಾದ ನಂಬಿಕೆ ಇಟ್ಟಿದ್ದಾರೆ. ನಂಬಿಕೆ ಎನ್ನುವುದು ತುಂಬಾ ಮುಖ್ಯ. ಕೇವಲ ನನ್ನ ಮೇಲೆ ಮಾತ್ರವಲ್ಲ, ಹಲವು ಆಟಗಾರರ ಮೇಲೆಯೂ ಅವರು ನಂಬಿಕೆ ಇಟ್ಟಿದ್ದಾರೆಂದು,” ಎಂದು ಚಹರ್‌ ಸ್ಪೋರ್ಟ್ಸ್‌ಕೀಡಾಗೆ ತಿಳಿಸಿದ್ದಾರೆ.

“ಪಂದ್ಯದ ನಿರ್ದಿಷ್ಟ ಸಮಯದಲ್ಲಿ ಆಟಗಾರರನ್ನು ಹೇಗೆ ಸದುಪಯೋಗಪಡಿಸಿಕೊಳ್ಳಬೇಕೆಂಬುದು ಎಂಎಸ್‌ ಧೋನಿ ನಾಯಕತ್ವದಲ್ಲಿರುವ ಅತ್ಯುತ್ತಮ ಗುಣಮಟ್ಟವಾಗಿದೆ. ಸಿಎಸ್‌ಕೆಗೆ ಪ್ರತಿಯೊಂದು ಪಂದ್ಯದಲ್ಲಿಯೂ ನಾನು ಪವರ್‌ಪ್ಲೇನಲ್ಲಿ ಮೂರು ಓವರ್‌ಗಳನ್ನು ಅತ್ಯುತ್ತಮವಾಗಿ ಬೌಲಿಂಗ್ ಮಾಡುತ್ತೇನೆ ಹಾಗೂ ಧೋನಿಯಿಂದ ನಾನು ಸಾಕಷ್ಟು ಕಲಿತಿದ್ದೇನೆ,” ಎಂದು ದೀಪಕ್‌ ಚಹರ್‌ ಹೇಳಿದ್ದಾರೆ.

ಬಯೋ-ಬಬಲ್‌ ಒಳಗಡೆ ಹಲವು ಆಟಗಾರರಿಗೆ ಕೋವಿಡ್‌-19 ಪಾಸಿಟಿವ್‌ ಬಂದ ಹಿನ್ನೆಲೆಯಲ್ಲಿ 2021ರ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಅರ್ಧಕ್ಕೆ ನಿಲ್ಲಿಸಲಾಗಿದೆ. ಈ ವೇಳೆಗೆ ಆಡಿದ್ದ 7 ಪಂದ್ಯಗಳಿಗೆ ಚಹರ್‌, 8 ವಿಕೆಟ್‌ಗಳನ್ನು ಕಬಳಿಸಿದ್ದಾರೆ.

ಭಾರತ ಸೀಮಿತ ಓವರ್‌ಗಳ ತಂಡದಲ್ಲಿ ಶ್ರೀಲಂಕಾ ಪ್ರವಾಸ ಮಾಡಲು ಎದುರು ನೋಡುತ್ತಿರುವ ದೀಪಕ್‌ ಚಹರ್‌ ಅವರು, ಎಂಎಸ್‌ ಧೋನಿ ಎರಡನೇ ಅವಧಿಯ ಐಪಿಎಲ್‌ ಟೂರ್ನಿಯಲ್ಲಿ ಕಮ್‌ಬ್ಯಾಕ್‌ ಮಾಡಲಿದ್ದಾರೆಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

“ಒಬ್ಬ ಬ್ಯಾಟ್ಸ್‌ಮನ್‌ 15 ರಿಂದ 20 ವರ್ಷಗಳ ಕಾಲ ಒಂದೇ ರೀತಿ ಬ್ಯಾಟಿಂಗ್‌ ಮಾಡಲು ಸಾಧ್ಯವಿಲ್ಲ. ಯಾವುದೇ ಸ್ಪರ್ಧಾತ್ಮಕ ಕ್ರಿಕೆಟ್ ಆಡದೇ ದೀರ್ಘಕಾಲ ಹೊರಗೆ ಇದ್ದು, ಐಪಿಎಲ್‌ ನಂತಹ ಗುಣಮಟ್ಟದ ಟೂರ್ನಿಯಲ್ಲಿ ಅತ್ಯುತ್ತಮವಾಗಿ ಆಡಬೇಕಾದರೆ ಸ್ವಲ್ಪ ಸಮಯವನ್ನು ಹೆಚ್ಚುವರಿಯಾಗಿ ತೆಗೆದುಕೊಳ್ಳಬೇಕಾಗುತ್ತದೆ. 2018 ಮತ್ತು 2019ರ ಆವೃತ್ತಿಗಳಲ್ಲಿಯೂ ಅವರು ಸ್ವಲ್ಪ ನಿಧಾನಗತಿಯಲ್ಲಿ ಆಡಿದ್ದರು. ಆದರೆ, ಅವರ ಸ್ಟ್ರೋಕ್‌ ತುಂಬಾ ಚೆನ್ನಾಗಿರುತ್ತದೆ. ಈ ಬಾರಿಯೂ ಅವರು ಎರಡನೇ ಅವಧಿಯಲ್ಲಿ ಅತ್ಯುತ್ತಮವಾಗಿ ಆಡಲಿದ್ದಾರೆ,” ಎಂದು ದೀಪಕ್‌ ಚಹರ್‌ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

LEAVE A REPLY

Please enter your comment!
Please enter your name here