ಭಾರತಕ್ಕೆ ಟೆಸ್ಟ್‌ ಫೈನಲ್‌ ಗೆದ್ದುಕೊಡೋ ಆಟಗಾರನ ಹೆಸರಿಸಿದ ಪಣೇಸರ್‌!

0
6
ಬೆಂಗಳೂರು: ನ್ಯೂಜಿಲೆಂಡ್‌ ವಿರುದ್ಧದ ಟೆಸ್ಟ್ ಚಾಂಪಿಯನ್‌ಷಿಪ್‌ ಫೈನಲ್‌ ಪಂದ್ಯದಲ್ಲಿ ಟೀಮ್‌ ಇಂಡಿಯಾಗೆ ಜಯ ತಂದುಕೊಡಬಲ್ಲ ಚಾಂಪಿಯನ್‌ ಆಟಗಾರ ಆಲ್‌ರೌಂಡರ್ ಎಂದು ಇಂಗ್ಲೆಂಡ್‌ ತಂಡದ ಮಾಜಿ ಸ್ಪಿನ್ನರ್‌ ಅಭಿಪ್ರಾಯ ಪಟ್ಟಿದ್ದಾರೆ.

ಭಾರತ ತಂಡ ತನ್ನ ಆಡುವ ಹನ್ನೊಂದರ ಬಳಗದಲ್ಲಿ ಅನುಭವಿ ಆಫ್‌ ಸ್ಪಿನ್ನರ್ ಆರ್‌ ಅಶ್ವಿನ್‌ ಅವರಿಗಿಂತಲೂ ಮೊದಲ ಆಯ್ಕೆಯ ಸ್ಪಿನ್ನರ್‌ ಆಗಿ ಜಡೇಜಾ ಅವರನ್ನೇ ತೆಗೆದುಕೊಳ್ಳಬೇಕು ಎಂದು ಇದೇ ವೇಳೆ ಪಣೇಸರ್‌ ಅಭಿಪ್ರಾಯ ಪಟ್ಟಿದ್ದಾರೆ.

ಜೂನ್‌ 18ರಿಂದ 22ರವರೆಗೆ ಸೌತ್‌ಹ್ಯಾಂಪ್ಟನ್‌ನ ರೋಸ್‌ ಬೌಲ್‌ ಕ್ರೀಡಾಂಗಣದಲ್ಲಿ ಕಿವೀಸ್‌ ವಿರುದ್ಧದ ಐಸಿಸಿ ವಿಶ್ವ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ ಪಂದ್ಯ ನಡೆಯಲಿದ್ದು, 23 ಅನ್ನು ಹೆಚ್ಚುವರಿ ದಿನಾಂಕವಾಗಿ ಕಾಯ್ದಿರಿಸಲಾಗಿದೆ. ಈ ಸಲುವಾಗಿ ಭಾರತ ತಂಡ ಜೂನ್ 2ರಂದು ಇಂಗ್ಲೆಂಡ್‌ ಪ್ರವಾಸ ಕೈಗೊಂಡ 14 ದಿನಗಳ ಕ್ವಾರಂಟೈನ್ ನಂತರ ಅಭ್ಯಾಸ ಆರಂಭಿಸಲಿದೆ.

ಕೊರೊನಾ ವೈರಸ್‌ ಸಂಕಷ್ಟದ ಸಮಯದಲ್ಲೂ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್ ಪಂದ್ಯವನ್ನು ಸುರಕ್ಷಿತವಾಗಿ ಆಯೋಜಿಸುವ ಉದ್ದೇಶದಿಂದ ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಕ್ರಿಕೆಟ್‌ ಮಂಡಳಿ ರೋಸ್‌ ಬೌಲ್‌ ಕ್ರೀಡಾಂಗಣದಲ್ಲಿ ಬಯೋ ಬಬಲ್‌ ನಿರ್ಮಾಣ ಮಾಡಲಿದೆ. ಕ್ರೀಡಾಂಗಣಕ್ಕೆ ಹೊಂದಿಕೊಂಡಂತೆ ಇರುವ ಕ್ರೀಡಾಂಗಣದಲ್ಲಿ ಆಟಗಾರರು ಉಳಿದುಕೊಳ್ಳಲಿದ್ದಾರೆ.

ಈ ಬಗ್ಗೆ ಮಾತನಾಡಿರುವ ಮಾಂಟಿ ಪಣೇಸರ್‌, ತನ್ನ ಆಡುವ ಹನ್ನೊಂದರ ಬಳಗದಲ್ಲಿ ಆರ್‌ ಆಶ್ವಿನ್‌ ಅವರಿಗಿಂತಲೂ ಆಲ್‌ರೌಂಡ್‌ ಆಟದ ಮೂಲಕ ಮ್ಯಾಚ್‌ ವಿನ್ನರ್‌ ಎನಿಸಿಕೊಂಡಿರುವ ರವೀಂದ್ರ ಜಡೇಜಾ ಅವರನ್ನು ಆಡಿಸುವುದೇ ಉತ್ತಮ ಎಂದು ಮಾಂಟಿ ಹೇಳಿದ್ದಾರೆ.

ಅಂದಹಾಗೆ ಇದೇ ವರ್ಷ ಭಾರತದ ಆತಿಥ್ಯದಲ್ಲಿ ನಡೆದ ಇಂಗ್ಲೆಂಡ್‌ ವಿರುದ್ಧದ ನಾಲ್ಕು ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಟೀಮ್ ಇಂಡಿಯಾ 3-1 ಅಂತರದ ಭರ್ಜರಿ ಜಯ ದಾಖಲಿಸಿತ್ತು. ಬ್ಯಾಟ್‌ ಮೂಲಕ ಶತಕ ಬಾರಿಸಿ ಚೆಂಡಿನಲ್ಲಿ 30ಕ್ಕೂ ಹೆಚ್ಚು ವಿಕೆಟ್‌ ಪಡೆದ ಆರ್‌ ಅಶ್ವಿನ್‌ ಸರಣಿ ಶ್ರೇಷ್ಠ ಆಟಗಾರನಾಗಿ ಹೊರಹೊಮ್ಮಿದ್ದರು. ಹೀಗಾಗಿ ಆಲ್‌ರೌಂಡರ್‌ ಜಡೇಜಾ ಮತ್ತು ಆರ್‌ ಅಶ್ವಿನ್‌ ನಡುವೆ ಟೀಮ್ ಇಂಡಿಯಾದ ಪ್ಲೇಯಿಂಗ್ ಇಲೆವೆನ್‌ನಲ್ಲಿ ಸ್ಥಾನ ಪಡೆಯಲ್ಲಿ ಭಾರಿ ಪೈಪೋಟಿ ಶುರುವಾಗಿದೆ.

“ನನ್ನ ಪ್ರಕಾರ ರವೀಂದ್ರ ಜಡೇಜಾ ಅವರನ್ನು ಆಯ್ಕೆ ಮಾಡಿಕೊಳ್ಳುವುದೇ ಸೂಕ್ತ. ಅವರೇ ಭಾರತ ತಂಡಕ್ಕೆ ಜಯ ತಂದುಕೊಡಬಲ್ಲ ಪ್ರಮುಖ ಆಟಗಾರ. ಐಪಿಎಲ್‌ ಟೂರ್ನಿಯಲ್ಲೂ ಅದ್ಭುತ ಆಟವಾಡಿ ಮಿಂಚಿದ್ದಾರೆ. ಭಾರತ ತಂಡ ಒಬ್ಬ ಸ್ಪಿನ್ನರ್‌ನ ಕಣಕ್ಕಿಳಿಸುವುದಾದರೆ ಅಶ್ವಿನ್‌ ಬದಲು ಜಡೇಜಾ ಅವರನ್ನೇ ತೆಗೆದುಕೊಳ್ಳಬೇಕು. ಜಡೇಜಾ ಅವರ ಎಡಗೈ ಬೌಲಿಂಗ್‌ ದಾಳಿ ಭಾರತ ತಂಡಕ್ಕೆ ಮೇಲುಗೈ ನೀಡಬಹುದು,” ಎಂದು ಇಂಡಿಯಾ ಟಿವಿಗೆ ನೀಡಿದ ಸಂದರ್ಷನದಲ್ಲಿ ಪಣೇಸರ್ ಹೇಳಿದ್ದಾರೆ.

“ಸೌತ್‌ಹ್ಯಾಂಪ್ಟನ್‌ನಲ್ಲಿ ನಡೆಯಲಿರುವ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಫೈನಲ್‌ ಪಂದ್ಯದಲ್ಲಿ ಸ್ಪಿನ್ನರ್‌ಗಳು ಮಹತ್ವದ ಪಾತ್ರ ವಹಿಸಲಿದ್ದಾರೆ. ಆದರೆ, ಐಸಿಸಿ ಈ ಪಂದ್ಯಕ್ಕೆ ಯಾವ ರೀತಿಯ ಪಿಚ್‌ ನಿರ್ಮಸುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ. ಇನ್ನು ಭಾರತ ಮತ್ತು ಇಂಗ್ಲೆಂಡ್ ನಡುವಣ ಟೆಸ್ಟ್‌ ಸರಣಿಯಲ್ಲಿ ಇಂಗ್ಲೆಂಡ್‌ ಖಂಡಿತವಾಗಿ ಗ್ರೀನ್ ಪಿಚ್‌ ನೀಡಲಿದೆ. ಆದರೆ ವಿಶ್ವಚಾಂಪಿಯನ್‌ಷಿಪ್‌ ಫೈನಲ್‌ನಲ್ಲಿ ಐಸಿಸಿ ಸ್ಪರ್ಧಾತ್ಮಕ ಪಿಚ್‌ ನೀಡಬೇಕು. ಈ ಪಂದ್ಯ ಕನಿಷ್ಠ4-5 ದಿನಗಳ ಆಟಕ್ಕೆ ಸಾಕ್ಷಿಯಾಗಬೇಕಿದೆ,” ಎಂದು ಪಣೇಸರ್‌ ಹೇಳಿದ್ದಾರೆ.

ಭಾರತ ತಂಡದ ಇಂಗ್ಲೆಂಡ್‌ ಪ್ರವಾಸದ ವೇಳಾಪಟ್ಟಿಟೆಸ್ಟ್‌ ಚಾಂಪಿಯನ್‌ಷಿಪ್‌ ಫೈನಲ್‌ ಪಂದ್ಯ
ಜೂನ್‌ 18-22ರವರೆಗೆ, ಸೌತ್‌ಹ್ಯಾಂಪ್ಟನ್‌
(ರೋಸ್‌ ಬೌಲ್‌ ಕ್ರೀಡಾಂಗಣದಲ್ಲಿ ನಡೆಯಲಿದೆ)

ಇಂಗ್ಲೆಂಡ್‌ ವಿರುದ್ಧದ 5 ಪಂದ್ಯಗಳ ಟೆಸ್ಟ್‌ ಸರಣಿಪ್ರಥಮ ಟೆಸ್ಟ್‌: ಆಗಸ್ಟ್‌ 4-8, ಟ್ರೆಂಟ್‌ ಬ್ರಡ್ಜ್ (ನಾಟಿಂಗ್‌ಹ್ಯಾಮ್)
ದ್ವಿತೀಯ ಟೆಸ್ಟ್‌: ಆಗಸ್ಟ್‌ 12-16, ಲಾರ್ಡ್ಸ್‌ (ಲಂಡನ್)
ತೃತೀಯ ಟೆಸ್ಟ್: ಆಗಸ್ಟ್‌ 25-29, ಹೆಡಿಂಗ್ಲೇ (ಲೀಡ್ಸ್‌)
ನಾಲ್ಕನೇ ಟೆಸ್ಟ್‌: ಸೆಪ್ಟೆಂಬರ್‌ 2-6 ಕೆನಿಂಗ್ಟನ್ ಓವಲ್ (ಲಂಡನ್)
ಐದನೇ ಟೆಸ್ಟ್‌: ಸೆಪ್ಟೆಂಬರ್‌ 10-14, ಓಲ್ಡ್‌ ಟ್ರಾಫೋರ್ಡ್‌ (ಮ್ಯಾಂಚೆಸ್ಟರ್‌)

ಇಂಗ್ಲೆಂಡ್ ಪ್ರವಾಸಕ್ಕೆ ಭಾರತ ತಂಡ ಹೀಗಿದೆವಿರಾಟ್ ಕೊಹ್ಲಿ (ನಾಯಕ), ಅಜಿಂಕ್ಯ ರಹಾನೆ (ಉಪನಾಯಕ), ರೋಹಿತ್ ಶರ್ಮಾ, ಶುಭಮನ್ ಗಿಲ್, ಮಾಯಾಂಕ್ ಅಗರ್ವಾಲ್, ಚೇತೇಶ್ವರ್ ಪೂಜಾರ, ಹನುಮಾ ವಿಹಾರಿ, ರಿಷಭ್ ಪಂತ್ (ವಿಕೆಟ್‌ಕೀಪರ್‌), ರವಿಚಂದ್ರನ್ ಅಶ್ವಿನ್, ರವೀಂದ್ರ ಜಡೇಜಾ, ಅಕ್ಷರ್‌ ಪಟೇಲ್, ವಾಷಿಂಗ್ಟನ್ ಸುಂದರ್, ಮೊಹಮ್ಮದ್ ಶಮಿ, ಮೊಹಮ್ಮದ್ ಸಿರಾಜ್, ಜಸ್‌ಪ್ರೀತ್ ಬುಮ್ರಾ, ಇಶಾಂತ್ ಶರ್ಮಾ.

ಕೆಎಲ್‌ ರಾಹುಲ್ ಮತ್ತು ವೃದ್ಧಿಮಾನ್ ಸಹಾ (ಫಿಟ್ನೆಸ್‌ ಟೆಸ್ಟ್‌ ನಂತರ ಆಯ್ಕೆ)ಕಾಯ್ದಿರಿಸಿದ ಆಟಗಾರರು: ಪ್ರಸಿಧ್ ಕೃಷ್ಣ, ಅಭಿಮನ್ಯು ಈಶ್ವರನ್, ಅರ್ಝಾನ್ ನಾಗವಾಸವಾಲ, ಅವೇಶ್ ಖಾನ್.

LEAVE A REPLY

Please enter your comment!
Please enter your name here