ಕೋವಿಡ್ ಮರಣ ಮೃದಂಗ: ಶವ ಸಂಸ್ಕಾರಕ್ಕೆ ಬೆಳಗಾವಿಯಲ್ಲೂ ಸೌದೆ ಕೊರತೆ..

0
7
ಪ್ರಮೋದ ಹರಿಕಾಂತ : ನಗರದಲ್ಲಿ ಕೋವಿಡ್‌- 19 ಮತ್ತು ಇತರ ಕಾರಣಗಳಿಂದ ಸಾವು ಹೆಚ್ಚಾಗುತ್ತಿದ್ದು, ಶವ ಸಂಸ್ಕಾರಕ್ಕೆ ಅಭಾವ ಶುರುವಾಗಿದೆ. ಈ ಕೊರತೆ ನೀಗಿಸಲು ಜಿಲ್ಲಾಡಳಿತ ಅರಣ್ಯ ಇಲಾಖೆ ಮೊರೆ ಹೋಗಿದೆ.

ನಗರದಲ್ಲಿ ಪ್ರತಿ ದಿನ 400-500 ಕೊರೊನಾ ಪಾಸಿಟಿವ್‌ ಪ್ರಕರಣಗಳು ಪತ್ತೆಯಾಗುತ್ತಿವೆ. ಕೆಲ ದಿನಗಳಿಂದ ಕೊರೊನಾ ಸೋಂಕಿತರ ಸಾವು ಸಹ ಹೆಚ್ಚಾಗಿದೆ. ಜತೆಗೆ ಕೊರೊನೇತರ ರೋಗಿಗಳ ಸಾವು ಕೂಡ ಅಧಿಕವಾಗಿದೆ. ಬೆಳಗಾವಿ ನಗರದ ಸ್ಮಶಾನಗಳಲ್ಲಿ ಪ್ರತಿ ದಿನ 20ಕ್ಕೂ ಹೆಚ್ಚು ಶವಗಳ ಸಂಸ್ಕಾರ ನಡೆಯುತ್ತಿದೆ. ಅವುಗಳ ಸಂಸ್ಕಾರಕ್ಕೆ ಸೀಮೆ ಎಣ್ಣೆ, ಕಟ್ಟಿಗೆ ಕೊರತೆ ಉಂಟಾಗಿದೆ. ಖಾಸಗಿ ಮಾರುಕಟ್ಟೆಯಲ್ಲಿ ಕಟ್ಟಿಗೆ ದರವೂ ಹೆಚ್ಚಾಗಿದೆ.

ಬೆಳಗಾವಿ ಮಹಾನಗರ ಪಾಲಿಕೆ ಮಾಹಿತಿ ಪ್ರಕಾರ ನಿತ್ಯ ಸರಾಸರಿ 10 ಶವಗಳನ್ನು ಸುಡಲಾಗುತ್ತಿದೆ. ಅನೇಕ ಸಮುದಾಯಗಳ ಜನರು ಮಣ್ಣಿನಲ್ಲಿ ಹೂಳುತ್ತಿದ್ದಾರೆ. ಕಳೆದ ಹಲವು ದಿನಗಳಿಂದ ಶವ ಸಂಸ್ಕಾರಕ್ಕೆ ಖಾಸಗಿ ವ್ಯಕ್ತಿಗಳಲ್ಲಿ ಮತ್ತು ಸ್ಮಶಾನದಲ್ಲಿ ಸಂಗ್ರಹವಿದ್ದ ಕಟ್ಟಿಗೆಗಳನ್ನು ಬಳಸಿ ಖರ್ಚು ಮಾಡಲಾಗಿದೆ. ಈಗ ಕಟ್ಟಿಗೆ ದರವೂ ದುಬಾರಿಯಾಗಿದೆ.

ಪತ್ರ ವ್ಯವಹಾರ: ಮೃತ ದೇಹಗಳನ್ನು ಸುಡಲು ಸರಕಾರಿ ದರದಲ್ಲಿ ಕಟ್ಟಿಗೆ ಪೂರೈಸಲು ಜಿಲ್ಲಾಡಳಿತ ಕ್ರಮ ಕೈಗೊಂಡಿದೆ. ಕಟ್ಟಿಗೆ ಕೊರತೆ ನಿರ್ವಹಿಸುವ ಜವಾಬ್ದಾರಿಯನ್ನು ಬೆಳಗಾವಿ ಮಹಾನಗರ ಪಾಲಿಕೆ ಆಯುಕ್ತರಿಗೆ ವಹಿಸಲಾಗಿದೆ. ಆಯುಕ್ತರು ಈಗಾಗಲೇ ಅರಣ್ಯ ಇಲಾಖೆ ಅಧಿಕಾರಿಗಳೊಂದಿಗೆ ಪತ್ರ ವ್ಯವಹಾರ ಆರಂಭಿಸಿದ್ದಾರೆ. ಸೀಮೆ ಎಣ್ಣೆ ಕೂಡ ಸರಕಾರಿ ದರದಲ್ಲಿ ಪೂರೈಸಲು ಕ್ರಮ ಕೈಗೊಳ್ಳಲಾಗಿದೆ.

‘ಪಾಲಿಕೆ ಅಂದಾಜಿನ ಪ್ರಕಾರ ಒಂದು ಶವ ಸಂಸ್ಕಾರಕ್ಕೆ ಕನಿಷ್ಠ ಎರಡು ಕ್ವಿಂಟಾಲ್‌ ಕಟ್ಟಿಗೆಯಾದರೂ ಬೇಕು. ಕಟ್ಟಿಗೆ ಪೂರೈಸಲು ಅರಣ್ಯ ಇಲಾಖೆ ಒಪ್ಪಿದ್ದು, ಕಟ್ಟಿಗೆಗೆ ದರ ನಿಗದಿ ಮಾಡಿದ ಬಳಿಕ ಬೇಡಿಕೆಗೆ ಅನುಗುಣವಾಗಿ ಖರೀದಿಸಿ ನಗರದ ಸ್ಮಶಾನಗಳಲ್ಲಿ ಕಟ್ಟಿಗೆಗಳನ್ನು ಸಂಗ್ರಹಿಸಿಡಲಾಗುತ್ತದೆ. ಬೇಕಾದವರಿಗೆ ಅರಣ್ಯ ಇಲಾಖೆ ನಿಗದಿ ಮಾಡಿದ ದರದಲ್ಲಿಯೇ ವಿತರಿಸಲಾಗುತ್ತದೆ’ ಎಂದು ಪಾಲಿಕೆ ಆಯುಕ್ತ ಜಗದೀಶ್‌ ಕೆ.ಎಚ್‌. ತಿಳಿಸಿದರು.

‘ಅಲ್ಲದೆ, ಸ್ಮಶಾನಗಳಲ್ಲಿ ಅನೇಕರು ಕಟ್ಟಿಗೆ, ಸೀಮೆ ಎಣ್ಣೆಗಳಿಗೆ ಹಣ ಇಲ್ಲದೆ ಪರದಾಡಿದ ಘಟನೆಗಳು ನಡೆಯುತ್ತಿವೆ. ಅಂಥವರಿಗೆ ಕಟ್ಟಿಗೆಯನ್ನು ಪಾಲಿಕೆಯಿಂದಲೇ ಕೊಡುವುದಕ್ಕೂ ವ್ಯವಸ್ಥೆ ಮಾಡಲಾಗುತ್ತಿದೆ’ ಎಂದು ಅವರು ತಿಳಿಸಿದರು.

ಮುಂದುವರಿದ ಸಾವಿನ ಸರಣಿ: ಬೆಳಗಾವಿ ಜಿಲ್ಲೆಯಲ್ಲಿ ಕಳೆದ ಒಂದೂವರೆ ತಿಂಗಳ ಅವಧಿಯಲ್ಲಿ 50ಕ್ಕೂ ಹೆಚ್ಚು ಕೊರೊನಾ ಸೋಂಕಿತರು ಮೃತಪಟ್ಟಿದ್ದಾರೆ. ಬೆಳಗಾವಿ ತಾಲೂಕಿನಲ್ಲಿ ಒಂದು ವಾರದ ಅವಧಿಯಲ್ಲಿ 13ಕ್ಕೂ ಹೆಚ್ಚು ಕೊರೊನಾ ಸೋಂಕಿತರು ಮೃತಪಟ್ಟಿದ್ದಾರೆ ಎಂದು ಆರೋಗ್ಯ ಇಲಾಖೆ ಹೇಳಿದೆ. ಅದರಲ್ಲಿ ಬಹುತೇಕರು ಬೆಳಗಾವಿ ನಗರ ವ್ಯಾಪ್ತಿಯವರು. ಇದಕ್ಕಿಂತ ಹೆಚ್ಚಿನ ಸಂಖ್ಯೆಯಲ್ಲಿ ಕೊರೊನೇತರ ರೋಗಿಗಳು ಸರಿಯಾದ ಚಿಕಿತ್ಸೆ ಸಿಗದೆ ಸಾಯುತ್ತಿದ್ದಾರೆ.

ಹಾಗಾಗಿ ಸ್ಮಶಾನಗಳಲ್ಲಿ ಚಿತೆಗಳು ಆರುತ್ತಲೇ ಇಲ್ಲ. ಒಂದರ ಹಿಂದೆ ಒಂದರಂತೆ ಶವಗಳು ಚಿತೆಯಲ್ಲಿ ಸುಡುತ್ತಿವೆ. ಬೆಳಗಾವಿ ಅಖಂಡ ಜಿಲ್ಲೆಗಿಂತ ಬೆಳಗಾವಿ ನಗರ ವ್ಯಾಪ್ತಿಯಲ್ಲಿ ಕೊರೊನಾ ಹೊಸ ಪ್ರಕರಣಗಳು ಮತ್ತು ಸಾವಿನ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗುತ್ತಿರುವುದು ಆತಂಕ ಸೃಷ್ಟಿಸಿದೆ.

‘ಸ್ಮಶಾನಗಳಲ್ಲಿ ಶವ ಸಂಸ್ಕಾರಕ್ಕೆ ಕಡಿಮೆ ದರದಲ್ಲಿ ಕಟ್ಟಿಗೆ ಕೊಡಿಸುವ ನಿಟ್ಟಿನಲ್ಲಿ ಅರಣ್ಯ ಇಲಾಖೆಗೆ ಪತ್ರ ಬರೆಯಲಾಗಿದೆ. ದರ ನಿಗದಿ ಆದ ಬಳಿಕ ಬೇಡಿಕೆಗೆ ಅನುಗುಣವಾಗಿ ಸ್ಮಶಾನಗಳಿಗೆ ಕಟ್ಟಿಗೆ ಪೂರೈಸಲಾಗುತ್ತದೆ. ಸೀಮೆ ಎಣ್ಣೆ ಕೊರತೆ ಸಮಸ್ಯೆಯನ್ನು ಈಗಾಗಲೇ ಬರೆಹರಿಸಲಾಗಿದೆ’ ಎಂದು ಬೆಳಗಾವಿ ಮಹಾನಗರ ಪಾಲಿಕೆ ಆಯುಕ್ತ ಜಗದೀಶ್‌ ಕೆ.ಎಚ್‌ ತಿಳಿಸಿದ್ಧಾರೆ.

LEAVE A REPLY

Please enter your comment!
Please enter your name here